130 രൂപയ്ക്ക് ഇഷ്ടമുള്ള 100 ചാനലുകള്; പുതിയ ചട്ടങ്ങളുമായ് ട്രായ്....

ടെലികോം അതോറിറ്റി ഓഫ് ഇന്ത്യയുടെ പുതിയ നിര്ദേശമനുസരിച്ച് രാജ്യത്തെ ഡിടിഎച്ച്, കേബിള് ടിവി ശൃംഖലകള്ക്ക് വലിയ മാറ്റം സംഭവിക്കുകയാണ്. വന്കിട ചാനല്/ഡിടിഎച്ച് കമ്പനികളില് നിന്നുള്ള ചൂഷണം തടയുക എന്ന ലക്ഷ്യത്തോടെ രാജ്യത്ത് പ്രക്ഷേപണം ചെയ്യുന്ന ചാനലുകള്ക്ക് ട്രായ് പുതിയ നിരക്കുകള് പ്രഖ്യാപിച്ചിരിക്കുകയാണ്. പുതിയ നിരക്കില് എല്ലാ ഡിടിഎച്ച്/ കേബിള് സേവനദാതാക്കളും നിശ്ചിത നിരക്കില് ചാനലുകള് നല്കേണ്ടിവരും. ബോക്കെ പാക്കേജുകളായി നല്കുന്ന ചാനലുകളുടെ വില 19 രൂപയില് കൂടരുതെന്നാണ് ട്രായിയുടെ നിര്ദേശം. ഇനി കൂടുകയാണെങ്കില് അവ ഒരോന്നായി പ്രത്യേകം നിരക്കില് നല്കണം. സൗജന്യ ചാനലുകള് ഈ പാക്കേജില് ഉള്പ്പെടുത്താനും പാടില്ല. ഇതനുസരിച്ച് പല ചാനലുകള്ക്കും ഇതിനോടകം വില പുതുക്കിയിട്ടുണ്ട്. ട്രായിയുടെ പുതിയ നിരക്ക് അനുസരിച്ച് 130 രൂപയുടെ അടിസ്ഥാന പാക്കേജില് 100 സ്റ്റാന്റേഡ് ഡെഫനിഷന് (എസ്.ഡി) ഫ്രീ റ്റു എയര് ചാനലുകള് ഉപയോക്താവിന് ലഭിക്കും. ഇതില് 26 നിര്ബന്ധിത സര്ക്കാര് ചാനലുകള് ഒഴികെയുള്ള 74 ചാനലുകള് ഉപയോക്താവിന് ഇഷ്ടാനുസരണം തിരഞ്ഞെടുക്കാവുന്നതാണ്. 100 ല് കൂടുതല് എസ്ഡി ചാനലുകള് വേണമെങ്കില് അധികമായി വരുന്ന 25 ചാനലുകള്ക്ക് 20 രൂപ അധികമായി നല്കേണ്ടി വരും.

ഒരു എച്ച്ഡി ചാനല് രണ്ട് എസ്ഡി ചാനലുകള്ക്ക് തുല്യം

ട്രായിയുടെ നിര്ദേശം അനുസരിച്ച് ഒരു എച്ച്ഡി ചാനല് രണ്ട് എസ്ഡി ചാനലുകള്ക്ക് തുല്യമാണ്. അതായത് അടിസ്ഥാന പാക്കേജില് 100 എസ്ഡി ചാനലുകള്ക്ക് പകരം 50 എച്ച്ഡി ചാനലുകള് നിങ്ങള്ക്ക് ലഭിക്കും (ഉദാഹരണം മാത്രം).

പേ ചാനലുകള്ക്ക് അധിക തുക

പേ ചാനലുകള്ക്ക് അധിക തുക നല്കണം. ഉദാഹരണത്തിന് അടിസ്ഥാന വിലയില് വരുന്ന 100 ചാനലുകള്ക്ക് പുറത്താണ് പേ ചാനലുകള് വരുന്നത്. എഷ്യാനെറ്റ് പോലുള്ള ചാനലുകള് ഉദാഹരണമായി പറയാം. അങ്ങനെയുള്ള ഒരോ ചാനലും പ്രത്യേകം കാശുകൊടുത്ത് പാക്കേജിനൊപ്പം ചേര്ക്കണം. 130 രൂപയ്ക്ക് പുറമെ വരുന്ന തുകയാണത്. അധികമായി ചേര്ക്കേണ്ടത് ഒരു ചാനല് മാത്രമാണെങ്കില് പോലും ഉപയോക്താവിന് അത് സാധിക്കും. ഇഷ്ടമില്ലാത്തതും ആവശ്യമില്ലാത്തതുമായ ചാനലുകള് ഉപയോക്താക്കള് മേല് അടിച്ചേല്പ്പിക്കുന്ന രീതി ഇതോടെ അവസാനിക്കും.